Հայաստանի հավաքականի եւ Երեւանի «Փյունիկի» ավագ Սարգիս Հովսեփյանը, ArmSport.am-ի հետ զրույցում հայտնեց, որ գոհ է «Եվրո-2012»-ի վիճակահանության արդյունքներից: Հովսեփյանը գտնում է, որ Հայաստանը դեռ երբեք այսքան նպաստավոր խմբում չէր հայտնվել եւ պարտավոր պայքարել եզրափակիչի ուղեգրի համար:

«Կարծում եմ, որ ավելի լավ վիճակահանություն մեզ համար չէր կարող լինել: Երկար տարիներ խոսում էինք եզրափակիչի ուղեգրի մասին եւ այժմ այդ խնդիրը լուծելը ռեալ է: Եթե այս անգամ էլ չնվաճենք ուղեգիր, ապա հետագայում շատ ավելի բարդ կլինի, քանի որ նման լավ վիճակահանություն ոչ միշտ է լինում»,- նշեց Սարգիս Հովսեփյանը:

Հայաստանի հավաքականում 109 հանդիպում անցկացրած փերձառու պաշտպանը գտնում է, որ 2-րդ խմբում ընդգծված ֆավորիտ չկա. «Մեր խմբում կան ուժեղ հավաքականներ, սակայն դժվար է որեւէ մեկին անվանել ընդգծված ֆավորիտ: Առանձնանում է Ռուսաստանը, որը սակայն Իսպանիա չէ: Ռուսները նույն Իսպանիային Եվրոպայի առաջնությունում 2 անգամ խոշոր հաշվով պարտվեցին: Այս անգամ իրոք պետք է ամեն ինչ անենք ուղեգիր նվաճելու համար»: