Հայաստանի հավաքականի նախկին գլխավոր մարզիչ Վարուժան Սուքիասյանը գտնում է, որ «Եվրո-2012»-ի ընտրական փուլի վիճակահանությունը շատ հաջող էր մեր ընտրանու համար: Ներկայումս «Իմպուլսը» գլխավորող մասնագետը ArmSport.am-ի հետ զրույցում նշեց, որ նախկինում Հայաստանը նման նպաստավոր խմբում չէր հայտնվել:

«Վիճակահանության ընթացքում բախտը մեր կողմն էր: Նախկինում նման հաջող վիճակահանություն մեզ բաժին չէր հասել: Գրանդ-հավաքականի բացակայությունը մեր խմբում արդեն իսկ դրական է, սակայն մրցակցությունը շատ թեժ է լինելու: Պարզապես, չի լինի հավաքական, որը ժամանակից շուտ կլուծի խնդիրը:

Միգուցե Ռուսաստանը կունենա որոշակի առավելություն, սակայն մյուս հավաքականներն էլ կփորձեն ետ չմնալ», - նշեց Վարուժան Սուքիասյանը:

Փորձառու մարզիչը գտնվում է, որ Հայաստանի հավաքականը կարող է պայքարել լավ արդյունքի համար. «Նախորդ տարիներին ուղեգիր նվաճելը միայն բարի ցանկություն էր, իսկ այժմ այդ նպատակն իրագործելն ավելի ռեալ է, եթե ճիշտ աշխատանք կատարվի: Կարեւոր է նաեւ խաղացանկը: Ցանկալի չէր լինի, եթե Ռուսաստանին մեր հավաքականը հանդիպեր աշնանը, քանի որ Ռուսաստանի առաջնությունը եւս անցկացվում է գարուն-աշուն տարբերակով:

Մյուս երկրներում աշուն-գարուն տարբերակով են անցկացվում առաջնությունները եւ աշնանը նրանց խաղացողները լավ մարզավիճակում չեն, իսկ մեր առաջնությունը գարուն-աշուն տարբերակով է անցկացվում եւ աշնանը հավաքականի շատ թեկնածուներ լիովին պատրաստ են լինում»: