«Եվրո-2012»-ի վիճակահանության կապացությամբ իր «90 րոպե» թերթին իր կարծիքն է հայտնել «Բանանց» ակումբի նախագահ, ՀՖՖ գործկոմի անդամ Սարգիս Իսրայելյանը.

«2-րդ խումբը Հայաստանի հավաքականի համար մահվան խումբ չեմ համարում, ուստի կարող ենք պայքարել բոլոր մրցակիցների հետ: Մեր հավաքականը պետք է առաջընթաց ապրի և՛ արդյունքի, և՛ խաղի որակի տեսանկյունից: Չնայած սերնդափոխություն է կատարվել, սակայն ճիշտ աշխատանքի դեպքում կարող ենք լավ արդյունք ապահովել:

Դրա համար կադրեր ունենք: Կարծում եմ, որ մեր խմբում ակնհայտ ֆավորիտ չկա: Ռուսաստանը, Իռլանդիան և Սլովակիան իրենց ցուցանիշներով առանձնանում են մյուսներից: Սլովակիան նվաճեց Աշխարհի Գավաթի ուղեգիրը, իսկ մյուս երկուսը Հարավային Աֆրիկա մեկնելուց մեկ քայլի վրա էին, բայց դա դեռ ոչինչ չի նշանակում նոր ընտրական փուլում: Բացի մարզական տեսանկյունից, կա նաև ֆինանսական հետաքրքրություն՝ հեռուստաիրավունքների վաճառքի առումով: Այդ տեսակետից կարծես թե սպասելիքները չարդարացան»: