14:09 
02.12.2009
Արգենտինահայ թենիսիստ Դավիդ Նալբանդյանը շարունակում է տեղեկացնել իր երկրպագուներին՝ ազդրի վիրահատությունից հետո նրա վերականգնման մասին։ Հիշեցնենք, որ Դավիդը վիրահատվել է այս տարվա մայիսին ու մինչ օրս չի կարողանում խաղահրապարակ դուրս գալ։ Նալբանդյանը մտադիր է հանդես գալ Սան-Խուանի ցուցադրական մրցաշարին, որ տեղի կունենա դեկտեմբերի 12-ին ու 13-ին։
«Այժմ ես ինձ շատ լավ եմ զգում, բայց ինձ մնացել է ևս մեկ քայլ անել՝ անցնել մրցակցային պրակտիկային։ Հիմա չի կարելի սխալվել նախապատրաստման ընթացքում, քանի որ նույնիսկ աննշան հապաղումը կարող է հանգեցնել նրան, որ ես դուրս կմնամ մրցակցային ռիթմից։ Բժիշկներն ասում են, որ նախկին որակները վերականգնելու համար անհրաժեշտ կլինի 2-3 ամիս։ Հուսամ, ինձ ավելի քիչ ժամանակ պետք կգա», - ասել է Նալբանդյանը։
«Նման վիրահատություններից հետո վերականգնումը անհատական բնույթ է կրում յուրաքանչյուրի համար։ Ես դեռ չգիտեմ, թե ինչ է տեղի ունենալու, որովհետև հիմա ուղղակի մարզվում եմ։ Մենք շատ ենք աշխատում, բայց պետք է տեսնել, ինչպես իրեն կդրսևորի իմ ազդրը խաղի ընթացքում։ Ես նման դեպք ունեցել եմ կարիերայի ընթացքում, երբ մեկ շաբաթվա ընթացքում ցավը նորից հետ է եկել։ Այդ դեպքերում շատ բարդ է մարզումների ճիշտ ռեժիմ ընտրել։ Առայժմ ես ցավեր չեմ զգում, բայց շատերը ասում են, որ խաղահրապարակ վերադառնալու առաջին օրերը ցավերը կարող են վերադառնալ։ Ու նույնիսկ այնպես, իբր, ոչ մի վիրահատություն չի եղել։ Ես մի փոքր զարմացած եմ, բայց ինձ հավատացրին, որ հետո կզգամ փոփոխություններ», մեջբերում է Նալբանդյանի խոսքերը gotennis.ru-ն։
|
