Հայաստանի սինքրոն լողի առաջնությունն այս տարի ամենայն հավանականությամբ կանցկացվի դեկտեմբերին: Հայաստանի հավաքականի գլխավոր մարզիչ Անահիտ Թավրիզյանը ArmSport.am-ին հայտնեց, որ նոյեմբերին նախատեսված առաջնությունը հետաձգվել է այն պատճառով, որ վերջին 3 ամիսներին վերանորոգման պատճառով չէր գործում Երեւանի ճարտարագիտական համալսարանի լողավազանը:

Հենց այստեղ են մարզվում Հայաստանում սինքրոն լողով զբաղվող մարզուհիների զգալի մասը, սակայն նրանք մարզումները վերսկսել են միայն վերջին օրերին: Բացի այդ Հայաստանի առաջնությունը կկայանա Երեւանում, թեեւ նախկինում նախատեսվում էր այն անցկացնել Գյումրիում:

Անահիտ Թավրիզյանը հայտնեց նաեւ, որ ֆինանսավորման դեպքում Հայաստանը ներկայացուցիչ կունենա դեկտեմբերի 10-12-ը Տաշքենդում կայանալիք միջազգային մրցաշարում: Միջոցներ գտնելու դեպքում մրցավայր կմեկնի Մարգարիտ Ղազարյանը, ով այս տարի ամռանը ելույթ ունեցավ Հռոմում կայացած Աշխարհի առաջնությունում: