Սերբիայում շարունակվում է ֆանատների դեմ պայքարը: Այն բանից հետո, երբ Բելգրադում սպանվեց ֆրանսիացի ֆուտբոլասեր, ՖԻՖԱ-ն սպառնաց Սերբիայի ֆուտբոլային միությանը, որ կարող է զրկել երկրի հավաքականին 2010 թ. Աշխարհի առաջնությանը մասնակցելու իրավունքից:

Սերբիայի դատախազությունը պահանջել է դադարեցնել 14 ֆան-ակումբների գործունեությունը, որոնցից մեկն էլ կասկածվում է ֆրանսիացի ֆանատի սպանության մեջ: Դեպքը տեղի էր ունեցել Եվրոպայի լիգայի «Պարտիզան»-«Թուլուզ» խաղից առաջ:

«Այդ խմբավորումների գոյությունը եւ գործունեության ծավալումն արգելելը անհրաժեշտ է, քանի որ նրան խախտել են երկրի սահմանադրությունը: Նրան էթնիկ, ռասայական եւ կրոնական ատելություն են սերմանում»,-ասել է Սերբիայի գլխավոր դատախազ Սլոբոդան Ռադովանովիչը:

Ավելորդ չէ նշել, որ Բելգրադի ոստիկանությունը օրերս քրեական գործ էր հարուցել այն բանի համար, որ երկրի նախագահ Բորիս Տադիչը Սերբիա-Ռումինիա (5:0) խաղի ընթացքում շամպայն է խմել սպորտի նախարարի հետ: Սերբիայում գործող օրենքների համաձայն մարզադաշտում եւ նրա տարածքում ալկոհոլի օգտագործումը արգելված է, որի համար սահմանված է 100-ից 1000 եվրո տուգանք:

Բորիս Տադիչը պատասխանելով մեղադրանքներին նշել է, որ ինքը շամպայնով բաժակը պարզապես վերցրել է կենաց ասելու համար եւ չի օգտագործել ալկոհոլ: