Ինչպես հաղորդում է ռուսական Sports.ru կայքը, Խարկովի «Մետալիստի» գլխավոր մարզիչ Միրոն Մարկևիչը երեկ նշանակվել է Ուկրաինայի հավաքականի գլխավոր մարզիչ։ Հենց երեկ էլ նա նշեց ծննդյան 59-ամյակը։

Նրա օգնականը այստեղ կլինի Կիևի «Դինամոյի» մարզիչ Յուրի Կալիտվինցևը։

Մարկևիչը մարզչական գործունեությունը սկսել «Վոլինյում» 1984 թվականին։ Նա նաև մարզել է «Պոդոլյե», «Կրիվբասս», «Կարպատներ» ու «Անժի» ակումբները։ 2005-ից աշխատում է «Մետալիստի» հետ, որը երեք անգամ այդ ընթացքում նվաճել է Ուկրաինայի առաջնության բրոնզե մեդալները։

«Ես շատ շնորհակալ եմ Ուկրաինայի ֆուտբոլի ֆեդերացիայի կազմկոմիտեից ու նախագահից՝ ինձ վստահելու համար։ Ես շատ լավ հասկանում եմ, թե ինչ է ինձ սպասում։ Հավաքականի խնդիրը արդեն նշվել է՝ հաղթել Եվրո-2012-ին։ Ես կարծում եմ, որ դա ճիշտ է, քանի որ պետք է քո առջև մեծ խնդիրներ դնես։

Բնականաբար, կադրային փոփոխություններ Ուկրաինայի հավաքականում լինելու են։ Բայց ամենակարևորը՝ հոգեբանությունն ու սեփական ուժերին հավատալն է։։ Ընդ որում՝ անչափ կարևոր է ուշադրություն դարձնել խաղի որակի վրա ու ցուցադրել այնպիսի ֆուտբոլ, որը դուր կգա մեր ֆուտբոլասերներին», - մեջբերում է Մարկևիչի խոսքերը «Советский спорт»-ը։