Ռամոս. Պիկեն կարող է վերանայել Բարսելոնա-ՊՍԺ հանդիպումը

11:20 19.04.2017

«Ռեալի» պաշտպան Սերխիո Ռամոսը մեկնաբանել է իր թիմի հաղթանակը «Բավարիայի» նկատմամբ Չեմպիոնների լիգայի քառորդ եզրափակչի պատասխան խաղում:

Այս խաղը Ռամոսի համար դարձել է 100-րդը Չեմպիոնների լիգայում: Հաղթանակի շնորհիվ մադրիդյան թիմը կիսաեզրափակչի ուղեգիր է նվաճել.

«Դեռ վաղ է խոսել եզրափակչի մասին. դեռևս մենք միայն կիսաեզրափակիչ ենք դուրս եկել: Հասկանալի է, որ մենք ցանկանում ենք հաղթել Չեմպիոնների լիգայում, այդ իսկ պատճառով շատ ուրախ ենք, որ «Բավարիային»՝ գլխավոր մրցակիցներից մեկին, դուրս թողեցինք հետագա պայքարից: ՉԼ-ում 100 հանդիպում. գեղեցիկ թիվ է: Հուսով եմ՝ դեռ երկար տարիներ հանդես կգամ «Ռեալում»,- Ռամոսի խոսքերն է փոխանցում «Marca»-ն:

Ռամոսը նաև գնահատել է «Բարսելոնայի» պաշտպան Ժերար Պիկեի արձագանքը «Ռեալ»-«Բավարիա» խաղի մրցավարությանը: Պիկեն «Սանտիագո Բեռնաբեու» մարզադաշտում կայացած խաղի ընթացքում «Թվիթերի» իր էջում գրառում է կատարել, որում ընդամենը բազմակետեր են եղել:

Նշենք՝ «Բավարիան» 84-րդ րոպեից խաղում էր 10 հոգով՝ Վիդալի վիճելի հեռացումից հետո: Բացի դա, «Բավարիայում» կարծում են , որ լրացուցիչ ժամանակում «Ռեալն» իր 2-րդ և 3-րդ գոլերը հեղինակել է խաղից դուրս իրավիճակից.

«Թող Պիկեն վերանայի ՊՍԺ-ի հետ տնային հանդիպումը: Գուցե, նա փոխի իր կարծիքը մրցավարների մասին: Եկեք սպասենք «Բարսելոնայի» մասնակցությամբ քառորդ եզրափակչի խաղին և տեսնենք, թե ինչ տեղի կունենա «Յուվենտուսի» հետ»,- ավելացրել է Ռամոսը:

Չեմպիոնների լիգայի 1/8 եզրափակչի՝ «Բարսելոնայի» և ՊՍԺ-ի միջև կայացած խաղն ավարտվել է կատալոնացիների՝ 6:1 հաշվով հաղթանակով, ինչը նրանց թույլ է տվել քառորդ եզրափակչի ուղեգիր նվաճել՝ Փարիզում 0:4 հաշվով պարտվելուց հետո: Շատ երկրպագուներ և մասնագետներ գոհ չեն մնացել պատասխան խաղում մրցավարի գործողություններից:

Share |

Լրահոս