Հրաչյա Ռոստոմյանն անդրադարձել է լեռնադահուկորդ Աշոտ Կարապետյանի մարզագույքի խնդրին

17:19 13.02.2018

Հարավային Կորեայի Փհենչհան քաղաքում ընթացող 23-րդ ձմեռային օլիմպիական խաղերում Հայաստանը ներկայացնող լեռնադահուկորդ Աշոտ Կարապետյանը հայտնվել է տհաճ իրավիճակում:

Նման հրապարակում է կատարել «Yerkir.am»-ը` հղում անելով իր աղբյուրներին:

Մասնավորապես, նշվում է, որ մինչ այս պահը լեռնադահուկորդը մարզմանը չի մասնակցել, վազքուղին չի փորձարկել, քանի որ մարզիկին դահուկային գույք չեն տրամադրել, իսկ նրա մարզահագուստի վրա առկա չէ «Հայաստան» նշումը:

Օլիմպիական խաղերի կազմակերպիչները պատճառաբանել են, որ նախատեսված ժամկետից ուշ են ստացել մարզիկի անունը, այդ իսկ պատճառով մարզահագուստի վրա համապատասխան նշումներն արված չեն:

Նախապես չի պատվիրվել նաև դահուկորդի մարզագույքը: Աղբյուրը գրում է, որ Աշոտ Կարապետյանն իր վարկանիշային միավորները հավաքել էր դեռևս հունվարի 21-ին, այսինքն Հայաստանի դահուկասպորտի ֆեդերացիան լեռնադահուկորդի անունը կարող էր ուղարկել օլիմպիական խաղերի մեկնարկից դեռ 19 օր առաջ: Սակայն չի արել:

Պատճառը գուցե կարող է լինել այն, որ օլիմպիական խաղերից առաջ խոսակցություներ կային, որ Հայաստանի լեռնադահուկային սպորտի հավաքականի գլխավոր մարզիչ Սեյրան Հարությունյանը նպատակադրվել է իր որդուն՝ լեռնադահուկորդ Հարություն Հարությունյանին ուղարկել Փհենչան, սակայն նրան չի հաջողվել ձեռք բերել համապատասխան վարկանիշ:

Այս պահին, թերևս, կարևոր է լուծել Աշոտ Կարապետյանի խնդիրը, որպեսզի նա կարողանա պատվով ներկայացնել երկիրը օլիմպիական խաղերում: «VERELQ»-ի հետ զրույցում ՀՀ Սպորտի և երիտասարդության նախարար Հրաչյա Ռոստոմյանը հավաստիացրել է, որ խնդիրը լուծված է և անհանգստանալ պետք չէ.

«Հավաստիացնում եմ, որ խնդիրը լուծված է, Աշոտ Կարապետյանն ունի անհրաժեշտ գույքը և ելույթ կունենա ըստ նախատեսվածի»,- ասել է նախարարը:

Մնացած հարցերին, թե ովքե՞ր են պատասխանատու նման իրավիճակի համար և ի՞նչ պատիժ կկրեն, նախարարը թողեց առանց մեկնաբանության՝ նշելով, որ այս պահին կարևորը մեր մարզիկի հաջողություններն են, որոնց ճանապարհին խոչընդոտները վերացված են:

Աղբյուրի տեղեկություններով, հենց Հրաչյա Ռոստոմյանի միջամտության արդյունքում դահուկորդի ընտրությունն ապահովվել է արդար ճանապարհով:

Աշոտ Կարապետյանի առաջին ելույթը նախատեսված է փետրվարի 18-ին:

Share |

Լրահոս