ՖԻՖԱ-ի նախագահը պատասխանել է Մանչեսթեր Սիթիին և ՊՍԺ-ին աջակցելու մեղադրանքներին

14:48 08.11.2018

ՖԻՖԱ-ի նախագահ Ջանի Ինֆանտինոն մեկնաբանել է մամուլում շրջանառվող այն լուրերը, որոնց համաձայն՝ իր գլխավորած կառույցը միատեսակ պատիժներ չի կիրառում ֆինանսական ֆեյր-փլեյի կանոնները խախտած ակումբների նկատմամբ:

Ավելի վաղ Football Leaks-ը հաղորդել էր «Մանչեսթեր Սիթիի» և «Պարի Սեն Ժերմենի» կատարած լուրջ խախտումների մասին:

«Ես ՖԻՖԱ-ի նախագահն եմ և ՈւԵՖԱ-ի նախկին գլխավոր քարտուղարը: Իմ նպատակն ակումբներին օգնելն է, ոչ դրանք քանդելը:

Հանդիպել եմ «Պարի Սեն Ժերմենի», «Մանչեսթեր Սիթիի» և այլ ակումբների ներկայացուցիչների հետ, որպեսզի ֆինանսական հավասարակշռություն հաստատելու հարցում ընդհանուր հայտարարի գանք, սակայն վերջնական որոշումներ կայացնողը ոչ թե ես եմ, այլ դատարանները և հանձաժողովները:

Ես իրավիճակը փոխելու հնարավորություն չունեմ: Բացի այդ, «Սիթին» և ՊՍԺ-ն 20 միլիոն եվրո տուգանք են վճարել: Եվ ոչ միայն նրանք: 30 ակումբից միայն երկուսն են որակազրկվել՝ «Միլանը», որի որակազրկումը հետագայում վերաքննիչ դատարանը չեղյալ համարեց, և մեկ ռուսական ակումբ:

Մարդիկ սխալվում են, երբ ասում են, թե ՖԻՖԱ-ն ֆավորիտ ակումբներ ունի: Պարզապես միջին կարգի ակումբներն ավելի շատ են պատժվում, քանի որ չեն վճարում իրենց պարտքերը և ֆուտբոլիստների գումարները, ինչը շատ լուրջ խնդիր է»,- Ինֆանտինոյի խոսքը մեջբերել է La Gazzetta dello Sport-ը:

Share |

Լրահոս