Արմեն Գյուլբուդաղյանց. Տղաների ցուցադրած խաղից գոհ եմ, արդյունքից՝ ոչ

10:00 24.03.2019

Եվրո-2020-ի ընտրական փուլի մեկնարկային տուրում Հայաստանի Ազգային հավաքականը հյուրընկալվելիս 1-2 հաշվով պարտվել է Բոսնիա և Հերցեգովինայի հավաքականին:

Մեր ընտրանու միակ գոլը 11-մետրանոցից խփել է Հենրիխ Մխիթարյանը: Խաղից հետո հավաքականի գլխավոր մարզիչ Արմեն Գյուլբուդաղյանցը պատասխանել է լրագրողների հարցերին, փոխանցում է ՀՖՖ-ի պաշտոնական կայքը:

– Թվաց, որ դուք երկրորդ խաղակեսն ավելի լավ անցկացրիք: Ի՞նչը փոխվեց ընդմիջմանը:

– Իմ կարծիքով՝ առաջին խաղակեսում էլ մենք լավ խաղացինք: Երկրորդ խաղակեսում թարմ հարձակվողներ մտցրինք՝ Բրիասկոյին և Բաբայանին, որոնք կարողացան ակտիվացնել խաղը և գոլային պահեր ստեղծել:

– Նայելով այս խաղը՝ կարո՞ղ եք լավատես լինել հաջորդ խաղի համար:

– Մենք ամեն խաղին էլ ավելի օպտիմիստ ենք: Մտածում ենք, որ հաջորդ խաղն ավելի լավ կխաղանք, խաղից խաղ ավելի կկատարելագործվենք:

– Բոսնիա և Հերցեգովինայի հավաքականի խաղի մասին ընդհանուր ի՞նչ կասեք:

– Իհարկե լավ ֆուտբոլ խաղացին: Ֆուտբոլում չկա արժանի ու ոչ արժանիի հարց: Ես խաղից հետո շնորհավորել եմ ձեր մարզչին հաղթանակի առթիվ:

– Ինչ-որ խնդիր կա՞ր ստանդարտ իրավիճակների հետ:

– Ոչ, խնդիրներ չունեինք: Պարզապես Բոսնիան լավ օգտագործեց իր ստանդարտ պահերը:

– Արամ Հայրապետյանի խաղի մասին ի՞նչ կասեք:

– Այո, մի քանի դրվագներում փրկեց թիմին, բայց դարպասապահի համար շատ կարևոր է կայուն ֆուտբոլ խաղալը: Շատ կուզեմ, որ նրա լավ խաղը շարունակական լինի:

– Ալիկ Առաքելյանը դուրս էր մնացել հայտացուցակից: Ինչպե՞ս կմեկնաբանեք դա:

– 23 հոգուց ավել չէինք կարող հայտավորել:

– Կա՞ ափսոսանքի զգացում:

– Տղաների ցուցադրած խաղից գոհ եմ, բայց արդյունքից՝ ոչ: Վստահ եմ, որ տղաները կարող են ավելի լավ խաղալ:

Share |

Լրահոս