Որակապես նոր թիմի հույսեր. Դիլիջանը գրեթե ամբողջությամբ փոխում է կազմը

Այսօր՝ հունվարի 21-ին նախապատրաստական փուլի ընթացքում «Դիլիջանն» առաջին հանդիպումն անցկացրեց:

«Ուրարտու-2»-ի դեմ ընկերական խաղի (2:6) մեկնարկային կազմում 9 լեգիոներներ կային, որոնք բոլորն էլ փորձաշրջան են անցնում թիմում: Նրանցից մեկը՝ Բոգդան Ռիբեցը դուբլի հեղինակ է դարձել: ArmSport-ին հայտնի է դարձել, որ փորձաշրջան անցնող ֆուտբոլիստները Ռուսաստանից, Ուկրաինայից եւ Մոլդովայից են: Նրանց մնալ-չմնալու հարցում հստակություն է լինելու փետրվարի սկզբին:

Մեկնարկային կազմում էին 2 հայ ֆուտբոլիստներ՝ Հակոբ Դոքմանյանը և Ռևիկ Եղիազարյանը, ով հեռացել է «Սևանից»:

«Դիլիջանի» գործողությունները ղեկավարում էր Հայկազ Վիրաբյանը, ով Առաջին խմբի առաջնության մեկնարկից թիմի ղեկին է:

«Դիլիջան» ֆուտբոլային ակումբի ելույթները կազմավորումից ի վեր չեն գոհացնում: Հայաստանում նորաստեղծ ակումբները ծանր փորձությունների միջով են անցնում, որոշներն էլ պարզապես չեն դիմանում:

Նախորդ տարի Հայաստան ժամանած անգլիացի ֆուտբոլասեր Ուիլ Թոմսոնը տարեվերջին հրաժարվեց ակումբից, որն ունեցավ նոր ղեկավարներ: Թոմսոնը «ֆուտբոլային ռոմանտիկ» էր, ով կարծում էր, թե «Դիլիջանը» մեկ տարում դառնալու է իր սիրելի «Քրիստալ Փելասի» նման թիմ…

«Դիլիջանը» տնային հանդիպումներն անցկացնում էր Դիլիջանի UWC միջազգային քոլեջում, ինչը մի շարք բարդություններ էր առաջացնում հաստկապես հյուր թիմերի համար՝ կապված անցագրերի և իրերը համալիրի տարածք անցկացնելու հետ:

Մրցաշրջանի առաջին հատվածից հետո ակումբն ունեցավ նոր ղեկավարություն: Առաջին որոշումը տնային մարզադաշտը փոխելն էր: Տոներից հետո «Դիլիջանը» մարզումներն անցկացնում է Վաղարշապատի ֆուտբոլի ակադեմիայում:

Ավելի վաղ «Դիլիջանից» հեռացել էին 10 ֆուտբոլիստներ՝ Սեմյոն Մուրադյանը, Դավիթ Մարկոսյանը, Մկրտիչ Չոբանյանը, Էդուարդ Մելքոնյանը, Կաու Էդուարդո Գոգենհանը, Գարո Էդուարդ Բալյանը, Ալդո Սալազար Գուերայը, Մահան Շահարխիզ Արաբանին, Վագներ Գդիկիանը: Այդ ցանկում նշված էր նաև Ուիլ Թոմսոնի անունը, ով ակումբի նախագահը լինելուց բացի նաև խաղում էր թիմում:

Հունվարի 24-ին «Դիլիջանն» ընկերական հանդիպում է անցկացնելու «Արարատ-2»-ի հետ, հունվարի 27-ին՝ «Տորպեդոյի», 31-ին՝ «Նոայի»:

Առաջին խմբի 1-ին հատվածից հետո «Դիլիջանը» 7 միավորով 17 թիմերի պայքարում 15-րդ հորիզոնականում է:

Արման Առաքելյան