Հակոբ Մկրտչյան. Երազանքս իրականացավ, սակայն այսքանով չենք սահմանափակվելու

21:53 11.04.2019

Հակոբ Մկրտչյանը Վրաստանի Բաթումի քաղաքում անցկացվող ծանրամարտի Եվրոպայի առաջնության 89 կգ քաշային կարգի չեմպիոնի կոչումը նվաճելուց հետո ՀԱՕԿ-ի մամուլի ծառայությանը պատմեց տպավորությունների մասին:

«Երազանքս իրականացավ, սակայն այսքանով չենք սահմանափակվելու: Առջեւում կան շատ մրցումներ, իսկ ամենակարեւորն Օլիմպիական խաղերն են: Պետք է բարձրանամ 96 կգ քաշային կարգ եւ բոլորին հաղթեմ նաեւ այնտեղ: Օլիմպիական խաղերին եւս կփորձեմ մասնակցել 96 կգ քաշային կարգում:

Երկրորդ տեղ գրաված վրացի ըմբիշն ինձ հավասար էր, պայքարեցինք միասին, եւ ես կարողացա հաղթանակի հասնել: Հրում վարժությունում ցանկանում էի կատարել նաեւ երրորդ մոտեցումը եւ թարմացնել ռեկորդը, սակայն մարզիչներն ասացին, որ պետք չէ: Կփորձեմ ռեկորդ գրանցել աշխարհի առաջնությունում, որտեղ հանդես կգամ 96 կգ քաշային կարգում:

Այս հաղթանակը նվիրում եմ հայրիկիս, սիրելիներիս ու ամբողջ հայությանը»,- նշեց Եվրոպայի նորընծա չեմպիոնը:

Հիշեցնենք, որ Հակոբ Մկրտչյանը երկամարտում գրանցել էր 371 կգ (164+207) արդյունք եւ սահմանել նաեւ Եվրոպայի ռեկորդ: Պոկում վարժությունում 22-ամյա ծանրորդը չորրորդն էր, իսկ հրում վարժությունում նվաճեց փոքր ոսկե մեդալ: Եվրոպայի փոխչեմպիոն դարձած վրացի Ռեւազ Դավիթաձեի երկամարտի արդյունքն էր 370 կգ (170+200):

Այս քաշային կարգում Հայաստանի մյուս ներկայացուցիչ Դավիթ Հովհաննիսյանը երկամարտի 360 կգ (165+195) արդյունքով դարձավ բրոնզե մեդալակիր: Պոկում վարժությունում 22-ամյա Հովհաննիսյանը 165 կգ արդյունքով նվաճեց փոքր բրոնզե մեդալ: Նա հաջող կատարեց բոլոր՝ 6 մոտեցումները:

Կարդացեք նաև

Share |

Լրահոս

Loading...