Դի Մարիան՝ ԱԱ-2018-ի մասին․ հավաքականի մթնոլորտը նման էր ռումբի, որը կարող էր պայթել ամեն պահի

21:54 10.06.2019

Արգենտինայի ազգային հավաքականի և ՊՍԺ-ի վինգեր Անխել դի Մարիան պատմել է, որ 2018 թվականին Ռուսաստանում կայացած Աշխարհի առաջնության ժամանակ թիմի մթնոլորտը հեռու էր իդեալական լինելուց։ 

«Ռուսաստանում հավաքականի մթնոլորտը նման էր ռումբի, որը կարող էր պայթել ամեն պահի։ Դժվար էր հաղթահարել այդ փորձությունը։ Սակայն հիմա ամեն ինչ այլ է։ Մենք դասեր ենք քաղել մեր սխալներից։ Առաջին հերթին մարզչական շտաբն ու խաղացողները պետք է միասնական լինեն։ Դա նպատակին հասնելու համար կարևորագույն նախապայման է։

Իրականում ինձ համար շատ բարդ է այդ առաջնության մասին խոսելը։ Մինչ մրցաշարի մեկնարկը մենք բազմաթիվ խնդիրներ ունեինք։ Դա շեղում էր մեզ ռիթմից։ Սկզբից մեզ թվաց, թե ամեն ինչ լավ է ընթանալու, բայց շատ շուտով ամեն ինչ ավարտվեց այնպես, ինչպես որ պետք է ավարտվեր»,-31-ամյա ֆուտբոլիստի խոսքերն է մեջբերում Globe Escorte-ն՝ հղում կատարելով Ole-ին։ 

Հիշեցնենք, որ Արգենտինան Ռուսաստանում կայացած աշխարհի առաջնության ժամանակ մեծ դժվարությամբ կարողացավ դուրս գալ փլեյ-օֆֆ փուլ։ Խմբում «ալբիսելեստեի» մրցակիցներն էին Նիգերիայի, Խորվաթիայի և Իսլանդիայի հավաքականները։ Վաստակած 4 միավորով Արգենտինան դուրս եկավ 1/8 եզրափակիչ, որտեղ 3-4 հաշվով զիջեց աշխարհի ապագա չեմպիոններին՝ Ֆրանսիայի ընտրանուն։ 

Share |

Լրահոս

Loading...