Ըմբշամարտի ԱԱ. Ալեքսանյանը չմասնակցեց եզրափակչին

17:02 16.09.2019

Հունահռոմեական ոճի ըմբիշ, 97 կգ քաշային կարգում աշխարհի և Եվրոպայի բազմակի, օլիմպիական խաղերի չեմպիոն Արթուր Ալեքսանյանը չի մասնակցի Ղազախստանում ընթացող ԱԱ-ի եզրափակչին: Այս մասին հայտնում է ըմբշամարտի ֆեդերացիայի մամուլի քարտուղարությունը:

Երեկ նա մրցման հետ անհամատեղելի վնասվածք էր ստացել՝ կոտրել էր կողոսկրը:

Այսպիսով, Ալեքսանյանը կարժանանա աշխարհի 2019 թվականի առաջնության փոխչեմպիոնի կոչմանը: Ոսկե մեդալը կստանա աշխարհի գործող չեմպիոն, Ռուսաստանի ներկայացուցիչ Մուսա Եվլոևը:

Ալեքսանյանը նաև Տոկիոյի 2020 թվականի Օլիմպիական խաղերի ուղեգիր է ապահովել:

Հիշեցնենք, որ մեր ըմբիշը պայքարը սկսել էր որակավորման փուլից. եզրափակչի ճանապարհին Ալեքսանյանը պայքարից դուրս էր թողել Բելառուսը ներկայացնող Հրաբովիկին (1/32, 5-0), Ֆինլանդիան ներկայացնող Մատի Էլիաս Կուսմանենին (1/16, 10-0), թուրք Ջենկ Իլդեմին (1/8, 4-2), իրանցի Մոհամադհադի Սարավիին (1/4, 4-3), վրացի Գեորգի Մելիային (1/2, 3-1):

Նշենք, որ այսօր Արթուրն ու Եվլոևը հանդիպելու էին 3-րդ Աշխարհի առաջնությունն անընդմեջ. ըմբիշների առաջին գոտեմարտը 2017-ին էր՝ Փարիզում կայացած ԱԱ-ի եզրափակչում, որում Ալեքսանյանը հաղթեց 3-1 հաշվով ու դարձավ Աշխարհի եռակի չեմպիոն: 2-րդ անգամ Ալեքսանյանն ու Եվլոևը հանդիպեցին 2018-ի հոկտեմբերին, Բուդապեշտում կայացած ԱԱ-ի կիսաեզրափակչում: Այստեղ ևս Արթուրը վնասվածքով էր մասնակցում և 1-3 հաշվով պարտվեց, իսկ հետո հրաժարվեց բրոնզե մեդալի համար պայքարից:

Share |

Լրահոս

Loading...